Работниците на „Комунална хигиена“ во ЈКП Тетово продолжуваат да работат во многу лоши услови, во објект во кој малку фали да се сруши таванот. И покрај тоа што градоначалникот на Општина Тетово пред година и половина вети подобри услови за хигиенските работници, дури најави и дислокација, но на терен ситуацијата останува критична. Од Општина Тетово молчат на новинарските прашања, пишува Порталб.мк.
Просториите каде што седат овие работници се надвор од секој животен стандард.
На 21 јануари 2022 година, градоначалникот на општина Тетово, Билал Касами ги посети овие простории, каде што рече дека ќе се ангажира за да ги подобри нивните услови.
„Нивното распоредување останува наша голема одговорност, со единствена цел, да создадеме што е можно покомотно и адекватно место за работниците од Општинската хигиена“, рече Касами на 21 јануари 2022.
Но денес, година и половина потоа, нема подобрување во просториите каде што работат хигиенските работници, и се уште не се дислоцирани од оваа локација.
Порталб.мк вчера ги посети овие простории, кои изгледаат вознемирувачки и може да се видат во подолните фотографии.
Од страна на „Комуналната Хигиена“ за време на нашата посета кратко нè известија дека се очекува да ги отстранат неисправните камиони и да се урне објектот каде што седат работниците, за потоа истото да се поправи, но без да даваат детали.
За ова ветување на Касами направено пред година и половина, прашавме во Општина Тетово, но од таму не одговорија на новинарските прашања. Ги посетивме и просториите на „Паркови и Зеленило“, и и таму просториите каде што седат работниците се во лоши услови.
Инаку, освен тешките работни услови, работниците на ЈКП се со две плати минус, додека од претпријатието се оправдуваат дека ова доаѓа како последица на неплаќање на фактурите од страна на граѓаните. Блокирањето на сметката на ЈКП доаѓа поради долг на претпријатието кон Управата за јавни приходи.