Рускиот претседател Владимир Путин денеска изјави дека воената операција на меѓународната коалиција, предводена од САД, во Сирија, не дава никакви резултати.
Путин предупреди дека оружјето што Вашингтон го доставува во Сирија би можело повторно да се најде во рацете на терористите.
– Сега соопштија дека од авион ја снабдуваат со оружје Слободната сириска армија. Каде е таа Слободна сириска војска? Нема ли тоа оружје повторно да се најде во рацете на Исламска држава, како што веќе се случи? Кој гарантира? – истакна Путин.
Рускиот претседател оцени дека акциите на официјална Москва во Сирија се „во строга согласност“ со Повелбата на ОН и со меѓународното право, што не е случај со коалицијата предводена од САД, која дејствува без резолуција на Советот за безбедност на ОН и барање од сириските власти.
