По два дена пауза (петок 08 јули, и сабота, 9 јули), вчера (недела, 10 јули 2022 г.) десничарската ВМРО-ДПМНЕ и екстремно левата „Левица“ повторно повикаа на протести против предлогот на ЕУ за отпочнување на преговоrи со Македонија | Фото: Мета.мк

По два дена пауза, ВМРО-ДПМНЕ и Левица синоќа во центарот на Скопје протестираа против предлогот на ЕУ за деблокада на бугарското вето за почетокот на преговорите на земјава со ЕУ. На вчерашните протести немаше инциденти, но пораката која што ја упати опозицијата е идентична – тие нема да го прифатат европскиот предлог за почеток на преговорите со ЕУ.

Од ВМРО-ДПМНЕ побараа да не се крие протоколот со Бугарија, којшто, според нив, значи „бугаризација на државата“. Од партијата велат дека со предлогот се овозможува Бугарија да ги пишува учебниците по историја во Македонија и да ја блокира земјава на патот кон ЕУ.

„Владата прво кажа дека ќе го објави, а сега веќе втора недела не го објавува протоколот. Предлогот кој власта сака да го помине низ Собрание е на штета на македонските национални интереси“, велат од ВМРО-ДПМНЕ.

На синоќешниот протест говореа актерката Весна Петрушевска, поранешниот амбасадор Мартин Треневски и претседателот на подмладокот на ВМРО-ДПМНЕ Сергеј Попов, кои во своите говори се изјаснија против предлогот на ЕУ и за пад на актуелната влада.

По протестот, од владејачката партија СДСМ излегоа со соопштение во кое велат дека ВМРО-ДПМНЕ и Левица лажат за наводна бугаризација и асимилација бидејќи немаат вистинска аргументација против членството во ЕУ.

„Бугаризација има колку што имаше кантонизација и федерализација. Без аргументација, антиевропска коалиција функционира врз база на хистерично ширење невистини, но и со обиди за предизвикување тензии и радикализација на атмосферата“, се наведува во соопштението на СДСМ.

Од СДСМ ги обвинија ВМРО-ДПМНЕ и Левица дека се кријат како организатори на насилните протести позади анонимен е-маил, којшто им служи како параван за испраќање на фотографии до медиумите.

„Ако Мицкоски и Апасиев мислат дека на овој начин ќе се спасат од одговорност за насилствата, се лажат“, велат од СДСМ.

Инаку, по вчерашните протести денеска во Собранието на РСМ ќе се одржи редовната понеделничка координација, на која треба да се разговара за тоа кога би можела да се одржи пленарната седница за Информацијата за содржината на предлог – преговарачката рамка за пристапните преговори на Северна Македонија со Европска Унија.

Од 11 часот е закажана собраниската седница на која ќе се расправа за ребаланост на буџетот за која што е планирана дебата од најмногу пет дена. Доколку има потреба, оваа седница ќе биде прекината и ќе биде закажана нова седница, на која на дневен ред би била Информацијата испратена од Владата.

Напишете коментар