Пожарот кај место викано Погана на југот на земјава е активен и се движи од село Ѓавато кон село Грчиште. Кај Ѓавато е запрен на 100 до 200 метри од селото, информираат во Центарот за управување со кризи (ЦУК). Освен тоа, вчера имало и поплави на повеќе објекти во општина Кочани, каде што исто така екипите на ЦУК интервенирале.
„На терен за гаснење на пожарот во Ѓавато моментално се екипи на Дирекцијата за заштита и спасување од Валандово – тим за брз одговор со 13 вработени, „Комуналец“ од Богданци со 10 луѓе, противпожарна служба од Дојран со една цистерна, како и противпожарна служба од Струмица со едно теренско возило со пумпа и пет пожарникари“, информираат во ЦУК.
Оттаму додаваат дека хеликоптер на АРСМ пристигнал во шест часот изутрина и веќе два пати има дејствувано.
Во ЦУК информираат и дека преку бројот за итни повици 112, во директни телефонски разговори на граѓани со територијалната противпожарна единица (ТППЕ) во Кочани, добиени се пријави за поплави на повеќе објекти во општина Кочани.
„Пријавени се и паднати дрва по улиците и коловозите, како и скинати кабли од електрични линии. Екипите на ТППЕ Кочани се излезени на терен и работат на испумпување на поплавените објекти. Побарана е и помош од околните единици за да интервенираат и тие, а побарана е помош и од ДЗС“, информираат во ЦУК.
Во текот на ноќните и утринските часови се интервенирало на повеќе улици и локации во градот на испумпување на вода и средување на просторот од паднати дрвја, како и две помали противпожарни интервенции во Кочани. Во интервенцијата учествувале сите пожарникари од ТППЕ Кочани 15 лица, 22 пожарникари од доброволното против пожарно друштво-Кочани, со сите ппмв и 4 пожарникари од ТППЕ Штип.
Синоќа имаше и два пожари на подрачјето на Куманово. Според првичните информации, пожар имало на градските гробишта и уште еден кај Ловечкиот дом.
