Веќе неколку недели не се работи на зградата на новата Клиничка болница во Штип. Ова е четврти целосен прекин на работите за изградба на здравствениот комплекс. По пропаѓањето на „Бетон“- Штип, градежните активности како изведувач ги презеде грчката компанија „Интеркат“. Овој пат, како што објаснува државниот секретар во Министерството за здравство, Владимир Милошев, причина е барањето на изведувачот за промена на проектот.

– Проектот е од 2015 година и надминати се некои технологии, кои изнудуваат промени. Тука е суштината во моменталниот застој во реализацијата и изградбата на Клиничката болница – рече Милошев.

Тој очекува наскоро да се ревидира проектот и да продолжи изградбата. Со ова, изградбата на првата фаза од Клиничката болница, која требаше да биде готова уште лани, многу веројатно е дека ќе биде пролонгирана.

На проектот вреден 30 милиони евра никако да му тргне, откако ангажираниот подизведувач на работите „Бетон“ отиде во стечај, а работите ги презеде носителот на тендерот „Интеркат“. Болницата, која што се гради со пари од Светска банка, е изведена до ниво на карабина.