Рокот за пријавување за бесплатен туристички викенд и за климатско-бањска рекреација истекува в понеделник.
Интересот за користењето на овие услоги е голем. Досега имаат аплицирано 15.260 пензионери, информира денеска министерот за труд и социјална политика, Диме Спасов, одговарајќи на новинарско прашање по промоцијата на аудиокниги за слепи лица.
Ова, рече Спасов, е навистина сериозна бројка и голем интерес за искористување на поволностите од овие два проекти, кои ќе почнат со реализација во март-април оваа година.
– Уште еднаш би сакал да ги повикам сите корисници на пензија да ја искористат оваа можност до 16 февруари да аплицираат во Фондот на пензиско и инвалидско осигурување, за да можеме да ги земеме предвид при правењето на ранг-листите и при изборот на оние пензионери што ќе имаат можност да ги користат овие бесплатни услуги – рече Спасов.
Услугите бањско-климатска рекреација на корисници на пензија за 2015 година и бесплатен туристички викенд за корисници на пензија за 2015 година може да ја користат лица корисници на старосна, инвалидска и на семејна пензија остварена според прописите на Република Македонија и според прописите на други држави со кои Република Македонија има склучено договор за социјално осигурување. Лицата корисници на пензија кои користат и паричен надоместок за помош и за нега од друго лице, додаток за мобилност или слепило, имаат право на придружник за време на бањско-климатската рекреација и при бесплатниот туристички викенд.
При рангирањето на поднесените барања, приоритет ќе биде даден на пензионерите кои пред пензионирањето работеле во рудници со подземен ископ и на пензионерите кои се корисници на инвалидска пензија со утврден повисок процент на инвалидност.