Со најновата одлука на Регулаторната комисија за енергетика и водни услуги (РКЕВУ), од полноќ по повисоки цени ќе се продаваат дизелот, екстра-лесното масло за домаќинство и бензинот Еуросупер-95. Еуросупер-98 ќе остане со истата цена.
Одлуката за поскапувањето се образложува со пораст на референтните цени на светските берзи.
За еден денар за литар ќе поскапат дизелот и екстра-лесното масло за домаќинство (ЕЛ-1), а за половина денар ќе поскапи бензинот Еуросупер 95.
Цените на бензинските станици од полноќ ќе бидат следниве: Еуросупер БС – 95 ќе се продава за 90,5 денари за литар, Еуросупер БС – 98 за 92,5 денари за литар, Еуродизел БС (Д-Е V) за 87 денари за литар, а екстра лесното масло (ЕЛ-1) за 86 денари за литар. Мазут М-1 НС ќе се продава за 48,268 денари за килограм.
