Поради зголемен прилив на барања за издавање на документи кои пристигаат во Дипломатско конзуларните претставништва на Република Северна Македонија, Министерството за надворешни работи најави дека ќе воведе двосменско работење во неколку европски градови.
„Во оваа прва група, според бројот на апликации, почнуваме со двосменско работење во Берн, Бон, Берлин и Минхен. Како ќе се појават потреби така ќе пристапиме кон зголемување на капацитетите и на други ДКП“, изјави министерот за надворешни работи Бујар Османи на денешната прес-конференција, додавајќи дека ова е првпат нашите конзуларни претставништва да работат во две смени сè со цел да се излезе во пресрет на граѓаните поради обврската да се променат личните документи до февруари 2024 година.
Тој рече дека поради обврската за промена на документите почнале да се создаваат огромни гужви, „што не било во ред за граѓаните кои имаат потреба од нивните документи“.
Како што најави министерот, се разгледува можноста за воведување на двосменско работење и во амбасадата во Лондон.