ВМРО-ДПМНЕ, СДСМ, претседателот на Собранието, Трајко Вељаноски на граѓаните им го честитаа 24 Мај – Денот на сесловенските просветители и учители, светите браќа Кирил и Методиј.
– Нивното дело е сè уште живо и остави вечен белег во културата, традицијата и во посебноста на сите словенски народи. Нивната света мисија за просветувањето и за продуховување на словенските народи во Европа, е само показател за силниот човечки дух и исконскиот порив да се зачува јазичната, културната и идентитетската посебност – се вели во честитката на ВМРО-ДПМНЕ.
Претседателот на СДСМ, Зоран Заев, смета дека овој ден претставува потстетник на нивната суштинската и историска улога за македонскиот народ и во создавањето на универзалните придобивки, како што се писменоста, обединувањето и просветлувањето на словенските народи.
– Преку својата благородна и просветителска дејност на овие простори, браќата Кирил и Методиј ја направија Македонија лулка на словенската култура и писменост, испишувајќи ги со тоа најсветлите страници од македонската историја. На овој ден, ја испраќаме пораката дека ќе го вратиме заслуженото место на делото и значењето на сесловенските просветители Кирил и Методиј и на нивните ученици, чија голема улога во поставувањето на темелите на јазикот, а со тоа и на културата и на идентитетот, заслужува достојна и непресушна почит од сегашните и од сите идни генерации во Македонија – се вели во честитката на Зев.
Претседателот на Собранието на Република Македонија, Трајко Вељаноски, во честитката до граѓаните вели дека посветеноста на Кирил и Методиј кон преводот на библиските текстови ги отвори портите на нови знаења и на сеопшт развој на многу народи низ Европа и пошироко.
– Светите браќа Кирил и Методиј и нивното епохално и цивилизациско дело се придонес за македонскиот народ и за народите што ги негуваат словенските културни особености. Наша е гордоста што нашите предци благодарение на светите браќа Кирил и Методиј добија можност на свој разбирлив јазик да ги примат и шират христијанските вредности – стои во честитката на Вељаноски.