Силвио Берлускони, поранешниот италијански премиер почина на 86-годишна возраст, јавија светските медиуми.
Тој починал во болницата „Сан Рафаеле“ во Милано. Во април годинава Берлускони бил лекуван од белодробна инфекција, поврзана со претходно неоткриен случај на хронична леукемија.
Медиумскиот тајкун Берлускони првпат дојде на функцијата во 1994 година и водеше четири влади на Италија, до 2011 година. Тој своевремено се опишуваше како „Исус Христос на политиката“ и ја предводеше централно-десничарската партија „Форца Италија“, која влезе во коалиција со премиерката Џорџија Мелони по изборите во септември.
Берлускони беше сопственик и основач на медиумските компании кои многумина ги нарекуваат „италијанска медиумска империја“. Според магазинот Форбс, Силвио Берлускони бил најбогатиот човек во Италија со имот вреден 12 милијарди долари во 2005 година, а бил и 25-ти најбогат човек во светот.
Тој исто така беше претседател на фудбалскиот клуб Милан помеѓу 1986 и 2004 година.
Италијанскиот министер за одбрана Гвидо Крозето напиша дека смртта на Берлускони оставила „огромна празнина“.
„Заврши една ера… Збогум Силвио“, напиша Крозето на Твитер.
