фото: Glenn Carstens-Peters на Unsplash

„Ми испратија часовник кој реално чини 100 денари и нема апсолутно никаква врска со тој на сликата што го рекламираат. Ме блокирале веднаш после доставата. Бришат коментари и блокираат луѓе. Внимавајте.“

Ова е само еден од постовите објавен во Фејсбук група наменета за обелоденување измами направени при купување производи што се нудат на социјалните мрежи. Граѓаните во неможност да реагираат поинаку, на овој начин, преку групи, посочуваат кога купиле нешто од некои конкретни кориснички профили, а не се задоволни од квалитетот на доставениот производ.

Колку често и какви пријави од граѓани добиваат одговорните во Организацијата на потрошувачи на Македонија (ОПМ) и дали има начин да се намалат измамите? За ова поразговаравме со Татјана Тасевска, која со години работи во оваа организација.

„Луѓето немаат проблем кога купуваат во било која продавница која е регистрирана и постои и физички. Во таков случај на легален начин си плаќаат со картичка, си добиваат сметка за купената стока. Но, проблем има со Фејсбук продажбата и Инстаграм подажбата и сето она што оди на социјални мрежи, каде најчесто зад тие профили стои некое физичко лице, а не правно лице“, вели Тасевска за Мета.мк.

Таа информира дека секој ден добиваат најмалку по четири претставки од граѓани кои се обраќаат во ОПМ преку електронска пошта или на нивната Фејсбук страна.

„Кога преку социјална мрежа ќе купите производ кој не ви се допаѓа, односно ако има несоодветна боја, број или е спорен квалитетот или пак, ако недостасуваат некои делови (кога се работи за технички производи), тогаш има проблем. И кога барате да ви ги исправат грешките, најчесто ве блокираат, а вие од тоа лице други контакти немате. Затоа треба да се едуцираат граѓаните дека треба да купуваат во легални продавници“, вели Тасевска.

Најбезбедно според неа, е да се купува во продавница која е регистрирана, има адреса и физички постои. Во таков случај на легален начин се плаќа со картичка, се издава фискална сметка.

„Кога се работи за Фејсбук и Инстаграм продажба, најчесто имаме реакции и за облека и за обувки, но и за технички производи, на пример, косилки за трева, блендери или пак, други апарати за домаќинство“, информира Тасевска.

ОПМ може да помогне само со едукација бидејќи не располага со други механизми на заштита. Дури и да се обратат оштетените граѓани во инспекциските служби, тие ќе им побараат документи бидејќи во Законот за потрошувачи стои дека може да се реагира, но исклучиво со фискална сметка.

„За облека купена онлајн не може ништо да се направи зашто немате адреса на фирмата, немате фискална, немате друг контакт. Имате само потврда од поштата дека ви го доставила производот, а тоа не е доволно. Ако не ви даваат фискална, не купувајте“, посочува Тасевска.

Согласно одредбите од Законот за потрошувачи, кога станува збор за физичка продажба, трговецот е должен совесно и чесно на потрошувачот да му даде точни и корисни информации во врска со квалитетот, карактеристиките на производот или услугата и во врска со условите за продажба, како и сите други информации побарани од потрошувачот содржани во декларацијата на производот.