На минус 10 Целзиусови степени ја минаа ноќта пленумците од Битола, кои вчера прогласија автономна зона на Техничкиот факултет. Дваесет и пет студенти, момчиња и девојчиња, во студените простории спиеле само на стиропор и во вреќи за спиење. Згора на тоа, постојано им паѓале осигурувачите, па било невозможно да вклучат и грејни тела. На располагање имаат само две простории, од кои една ја користат за спиење, а другата како кујна.
Борис Николевски, член на „Студенстки пленум“, за „Мета“ изјави дека и покрај што го „јаделе“ големиот студ, остануваат во автономната зона сè додека МОН не им ги отвори вратите за преговири и не ги прифати нивните барања.
– Парното ни го исклучија, и за тоа знаевме уште попладнето, но во текот на вечерта само што ќе вкулчевме полнач од мобилен телефон, паѓаа осигурувачите и со часови останавме без струја и во ладни простории. Беше невозможно да вклучиме греалка. Така, случајно или не, на температура длабоко под нулата, останавме цела ноќ без греење – вели Николевски.
Што се однесува до храната и до потребните средства за хигиена, Николевски апелира до граѓаните за помош, особено зашто во текот на денот се собираат повеќе од стотина пленумци на алтернативните предавања и програмата која веќе им е осмислена.
А.Б.