Пензионери од повеќе градови низ земјава денеска повторно протестираа пред зградата на Владата. Оттаму побараа линеарно зголемување на пензиите за 3.500 денари, а не за 6,8 отсто како што беше најавено.
Ова е втор ваков протест на македонските пензионери, од каде тие порачаа дека за да можат да живеат „нормално“, минималната пензија требало да биде 45 отсто од просечната плата.
За просечната пензија, пак, која сега изнесува околу 19.000 денари, пензионерите и нивниот синдикат побараа да изнесува 60 отсто од просечната нето-плата, односно да биде околу 21.900 денари.
„Заслужуваме достоинствен живот“, „Ако има за вас, треба да има и за нас“ – беа само дел од пораките кои стотици пензионери денеска ги упатија од главниот град.
На средба во Владата ги прими министерката за труд и социјална политика Јованка Тренчевска, кој им посочила дека Владата има слух за нивните барања.
Тренчевска истакнала дека веднаш по одржаната средба во Министерството за труд и социјална политика летово била формирана и работна група со номинирани членови на сите засегнати страни, како и дека таа работна група редовно одржува состаноци на кои се разгледуваат сите пристигнати барања и предлози од здруженијата на пензионери, Партијата на пензионери и Сојузот на пензионери на Македонија.
„Преку методологијата, пензиите за нецели две години пораснаа за околу 24 отсто. Притоа се обезбедува и стабилност на пензискиот систем и редовна исплата на пензиите. Работната група кога ќе ги финализира предлозите ќе ги достави до Владата на усвојување и за тоа ќе биде известена јавноста“, соопштија денеска од Министерството за труд и социјала.
Пензионерите рекоа дека ќе ги почекаат понудените решенија, а доколку предлогот не им одговара, најавија радикализација на протестите.
