Се добива впечаток дека е тоа некоја лична борба на Заев, дека тој има нешто во џебот, никој друг околу него не знае за што станува збор и бие некоја приватна политичка битка. Сите ние тука, прво, сме упатени за што станува збор, како и другите политички партии што се во опозицијата. И тие материјали не ги нарекуваме „бомби“ или „експлозиви“. И тие материјали не се ниту негови, не се ниту мои, туку се наши, ваши, на сите нас, истакна Стево Пендаровски на синоќешната трибина на опозицијата во Кавадарци.
– И кога ќе дојде време, а по мое убедување ќе дојде многу наскоро, ние сите заедно повторно ќе мораме да ги употребиме тие средства за да ги вразумиме тие што се на власт, за кои очигледно не постои друг начин да им влезе в глава дека Македонија не е приватна сопственост, дека Македонија не е акционерско друштво, на само едно семејство или на пет-шест души, дека таа ни е дадена уште од дедо и од прадедо и мораме ние да им ја дадеме на следните генерации, затоа што Македонија е вечна и мора да трае вечно – рече Пендаровски.
