Партијата на обединети пензионери и граѓани на Македонија (ПОПГМ), со одлука на извршниот одбор, им се придружи на политичките субјекти и на невладините организации од Република Македонија кои се залагаат за спроведување на принципи и ставови во правец на итно и целосно решавање на државно-политичката и институционална криза во земјата.
„ПОПГМ ги поддржува силите кои се за раздвојување на партиите од институциите на државата и за создавање систем кој ќе оневозможи злоупотреба на државните органи и институции. Исто така, се залагаат за независно, непристрасно и објективно судство во служба на граѓаните, за почитување на темелните уставни вредности и права на граѓаните, за слободни медиуми и критичка мисла“, се вели во нивното соопштение.
Во соопштението се наведува дека ги поддржуваат силите кои се за јасно и конкретно дејствување за интегрирање на Република Македонија во ЕУ и во НАТО, искажувајќи сериозна загриженост за длабоката државно-политичка и институционална криза во Република Македонија, раководени од принципите на демократија, одговорност, граѓанско единство, мултиетничка солидарност и заложби за сеопшт просперитет на нашето општество – соопштуваат од ПОПГМ.