Во рамките на дводневната посета на Северна Македонија, заменик помошникот и државен секретар за европски и евроазиски прашања и специјален претставник на САД за Западен Балкан, Габриел Ескобар оствари средба и со министерот за надворешни работи, Бујар Османи.
Тие, како што соопшти Министерството за надворешни работи (МНР) разменија мислења за актуелните политички случувања, со акцент на европското досие на Република Северна Македонија, како и потребата од продолжување на процесот на преговори со ЕУ преку спроведување на уставните измени.
“САД имаат клучна улога во сите поважни внатрешни и надворешно-политички моменти од поновата историја на Северна Македонија, давајќи цврста поддршка за нашето успешно етаблирање како независна држава, длабоко интегрирана во трансатлантското семејство на модерни и функционални демократии“, истакна Османи додавајќи дека блокадата на евроинтегративниот процес нѐ чини една милијарди евра годишно финансиска поддршка од ЕУ.
Османи искажа благодарност и за долгорочната поддршка од САД за севкупните реформски процеси, нагласувајќи дека Владата и останатите институции продолжуваат да работат со силна посветеност на спроведувањето на реформите во областа на доброто владеење, владеењето на правото и борбата против корупцијата.
На средбата беше направен осврт на соработката меѓу двете земји, во рамки на Стратешкиот дијалог, а стана збор и за сојузништвото во рамки на НАТО, со акцент на поддршката за Украина, како и претседавањето на Северна Македонија со ОБСЕ, САД – Јадранската повелба и Процесот за соработка во Југо-источна Европа.
Ковачевски-Ескобар: Македонија треба да стане членка, бидејќи ЕУ е наша единствена алтернатива
Ескобар, вчера се сретна и со претседателот Стево Пендаровски, а денес дмаќин му беше и премерот Димитар Ковачевски. А, заедно со амбасадорката на САД, Ангела Агелер имаа средба и со лидерот на опозициската партија ВМРО-ДПМНЕ, Христијан Мицкоски.
