Од локалната самоуправа во Охрид, преку соопштение, денешната прес-конференција на претседателот на ОО на СДСМ од Охрид, Томислав Тунтев, ја оценуваат како обид „преку изнесување небулози во негов стил, да се оправда пред охриѓани за злоделата што му ги направи на Охрид“.
„Фактите кажуваат, а и охриѓани знаат дека во периодот кога Вие бевте заменик-градоначалник на општина Охрид, таа и јавните претпријатија се стекнаа со долг поголем од 50 милиони евра, долг кој не го памети поновата историја на Европа за толку мал град како што е Охрид“, се вели во соопштението.
Од локалната самоуправа порачуваат дека актуелната локална власт не само што не доживеала фијаско, туку и со таква катастрофална финансиска состојба во која ја остави претходната, успеа за само една и пол година да реализира стотина проекти во делот на нови улици, тротоари, атмосферска канализација, фекална канализација.
„Отворивме нови градинки, успеавме да реконструираме школи и градинки. Градиме и реконструираме игралишта. Градиме и уредуваме плоштади секаде каде што е тоа потребно. Охрид многу наскоро ќе го добие најсовременото игралиште за фудбал на вештачка трева. Во тек се уште многу проекти“, потсетуваат од локалната самоуправа.
Од Општина Охрид напоменуваат дека имаат целосна доверба во органите кои се надлежни за разоткривање на евентуални криминални дејства на поранешни функционери во Општина Охрид и се оградуваат од секаков коментар додека трае постапката.
Претседателот на ОО на СДСМ од Охрид, Томислав Тунтев, кој е и пратеник во оставка, а извршуваше и функција заменик-градоначалник, денеска од прес-конференција, приведувањето на ексградоначалникот Александар Петрески го окфалификува како политички прогон и судска фарса.
