Минималната плата во земјава од март 2024 година ќе изнесува 22.500 денари, но покрај оваа најава од владата, засега нема конкретен одговор за многубројните барања за покачување на платата на јавната администрација. Синдикатот на Фондот за здравствено осигурување најавува штрајк, а судската администрација и денеска организираше протест.
Вицепремиерот Фатмир Битиќи денеска одговори дека вработените во Фондот за здравство, во обвинителството и во судството ќе добијат повисоки плати тогаш кога граѓаните ќе добијат квалитетни услуги од нив.
„Немаме никаков проблем да ги зголемиме платите и во здравство при тоа ако имаме здравствени услуги соодветни за нашите баби и дедовци, родители, за нас самите. Немаме проблем да ги зголемиме платите и во судство и во обвинителство ако при тоа граѓаните не чекаат по шест години за своите предмети за да им се реши судбината. Нема проблем, ќе решиме“, изјави вицепремиерот Битиќи, додавајќи дека ваквиот раст на платите не треба да биде на штета на останатите категории граѓани.
Во предлог буџетот за следната година предвидени се пари за зголемување на минималната плата. Околу 50.000 административци ќе добијат покачување за 2.325 денари. Останатите вработени во јавниот сектор, усогласувањето на платите кое им следува ќе го добијат во септември.
Инаку, наредната недела се очекува државниот буџет да влезе во собраниска процедура, при што најавите на синдикатите се дека пред Собранието ќе одржат голем протест не само вработените од судството, од државното обвинителство и од правобранителството, туку и од други синдикални организации.
