Првиот број на сатиричниот магазин „Шарли ебдо“ по минатонеделниот напад на редакцијата, веднаш е распродаден откако се појавил во трафиките во Франција.
– Тоа е неверојатно. Имаше 60-70 луѓе кои чекаа ред за да отворам. Никогаш не сум видела нешто слично. Сите мои 450 примероци ги продадов за 15 минути – вели продавачка од трафика во Париз.
Најновото издание на „Шарли ебдо“ на насловната страница го има пророкот Мухамед, кој плаче и држи порака „Јас сум Шарли“, а истовремено е испишано „Сè е простено“.
Весникот е отпечатен во три милиони примероци, а заработувачката ќе биде наменета за семејствата на загинатите.
Вообичаено, весникот досега излегуваше во 60.000 примероци. Новиот број, кој го изработија преживеаните членови на редакцијата, е достапен во 25 земји и на 16 јазици.