Сè уште не се исполнети минималните услови за распуштање на парламентот и за распишување веродостојни избори во кои ќе веруваат сите граѓани на Македонија, велат граѓанските организации во обраќањето до меѓународната заедница.
„Доколку Собранието се распушти на 7 април 2016 година, а претседателот на ДИК не го потпише избирачкиот список, односно не даде одобрение за негово користење на изборите, тогаш се создава правен вакуум или, подобро кажано, правен хаос кој е предолго присутен во Македонија. Во таква ситуација, политичката и институционалната криза ќе се продлабочат, а последиците се тешки за предвидување. Токму затоа цениме дека треба да се преиспита одлуката за распуштање на Собранието на Македонија и таа да се донесе тогаш кога сите услови за фер и деморкатски избори ќе бидат исполнети“, велат од граѓанските организации и ја повикаа ДИК без одложување да објави кога можат да се завршат подготовките за фер, слободни и демократски избори.
Граѓанските организации сметаат дека и од аспект на медиумските состојби и медумските реформи не постојат услови за фер, слободни и демократски избори.
„Ваквите трендови во овие клучни области темелно го поткопуваат Договорот од Пржино и неговата основна цел, да овозможи ослободување на партизираните институции и да обезбеди инструменти со кои преодната влада ќе организира слободни, фер, демократски и веродостојни избори“, се вели во обраќањето на граѓанските организации.
Обраќањето е потпишано од Македонски центар за европско образование, Хелсиншки комитет за човековите права, НВО Инфоцентар, Фондација „Отворено општество“ – Македонија, „Транспарентност„ – Македонија, Фондација „Метаморфозис“ и од Институт за човекови права.
