Стопанските комори се против даночните реформи за прогресивно оданочување


Скопје, 5 ноември, 2018 - 15:44 (META) 

Бизнис-заедницата смета дека, доколку прогресивното оданочување се реализира, истото би имало негативни последици врз целата бизнис заедница со тоа што значително ќе се зголеми сивата економија и ќе се нарушат условите под кои ќе се одвива целокупната економија во државата.

Ова го покажува анализата на резултатите од истражувањето помеѓу членовите на Платформата за јавно – приватен дијалог во која се Стопанска комора на Македонија, Стопанска комора за информатички и комуникациски технологии – МАСИТ, Стопанска комора на северозападна Македонија и Сојуз на стопански комори на Македонија.

„При тоа треба да се има предвид фактот дека станува збор за сериозна промена на даночниот режим со кој се создава нов систем на обврски на неполни два месеци пред крајот на годината, кога најголем дел од деловните субјекти веќе ги имаат направено планирањата за следната фискална година. Со предложените измени во даночниот систем се усложнува работењето на компаниите“, се вели во соопштението на „Епи центар Интернационал“ кој го имплементира проектот „Партнерство за подобра бизнис регулатива“, финансиран од страна на УСАИД.

Стопанските комори се согласни дека изразениот став е јасен и недвосмислен и дека неопходно е да се земе предвид при креирање и ревидирање на националните политики.

„Врз основа на спроведеното истражување стопанските комори испратија и официјален Позиционен документ до Владата и сите надлежните министерства. Со овој документ стопанските комори излегоа со заедничко барање за одложување на најавените даночни реформи за воведување на прогресивно оданочување, за најмалку пет години. Воедно, стопанските комори и понатаму повикуваат на конструктивен дијалог за заедничко креирање на сите политики кои ја засегаат бизнис заедницата, со цел да се избегнат непоправливите штети кои би можеле да му се нанесат на македонското стопанство како резултат на избрзани одлуки во кои не се земени предвид сите релевантни фактори“, се додава во соопштението.


Надлежните без конкретни рокови за завршување на автопатот Миладиновци – Штип


Штип, 4 октомври, 2018 - 16:36 (META) 

Дождливите денови во јуни и свлечиштата што се појавија на одделни делници, го пролонгираа рокот за завршување на автопатот Штип – Миладиновци, кој се гради веќе петта година. Ова е објаснувањето од директорот на ЈП за државни патишта, Зоран Китанов, кој не даде прецизен одговор кога автопатот ќе биде завршен – кон средината на овој месец, во ноември или сепак ќе се почека.

– Се работи на клучката кај Три Чешми. За некои десетина дена асфалтирањето на патот комплетно завршува. Во меѓувреме забрзано се работат еластичните огради, поставувањето на мрежите, одводните канали. Значи автопатот Миладиновци-Штип е во завршна фаза и ќе биде пуштен согласно очекувањата и препораките од надзорот – рече Китанов.

Китанов и министерот за транспорт и врски  Горан Сугарески денеска беа во увид на градежните работи на експресниот пат Штип – Радовиш, на кој видливо забрзано се работи. Трасата е целосно пробиена, а завршува првата фаза од реката Брегалница до клучката кај Бучим, со што се завршени 10 проценти од патот.

– Трасата е комплетно завршена и веќе може да се очекува да се градат завршните делови. Во меѓувреме заврши тендерот за рехабилитација на споредниот регионален пат и кога возилата ќе се движат по оваа траса, тој ќе биде асфалтиран за да не претрпи дополнителни оштетувања – изјави Китанов.

Експресниот пат Штип – Радовиш, што го гради „Штрабаг“ и чини 47 милиони евра, се очекува да биде готов за две години.


Откако Милошоски ja откажа, Џафери пресече и ја закажа Комисијата за надворешна политика


Собрание, 1 август, 2018 - 12:06 (META) 

Откако седницата на Комисијата за надворешна политика денеска беше одложена четврти пат, претседателот на Собранието Талат Џафери, ја свика Комисијата за денеска, со почеток во 11.30 часот.  Претпладнево првин беше најавено дека Комисијата ќе има седница, но набргу потоа таа беше откажана.

Џафери во соопштението до јавноста вели дека е недозволиво одложувањето на седницата од претседателот Антонио Милошоски, кој се повикал на Деловникот и на најавата од Џафери вчера на средбата со новинарите дека пратениците од денеска се на одмор. Џафери вели дека Собранието е во постојано заседание.

За свикувањето на седницата претседателот на Собранието се повикува на членот 120 од Деловникот на Собранието.

„Член 120 од Деловникот за работа на Собранието пропишал: aко претседателот на работното тело не свика седница кога е должен тоа да го стори, седницата ја свикува претседателот на Собранието.  Недозволиво е денешното повторно одложување на седницата на Комисијата, со образложение од претседателот на Комисијата дека пратениците согласно Деловникот се на одмор од 1 до 31 август, и дека претседателот Џафери, на средба со новинарите најавил дека од 1 август пратениците се на одмот. Член 5 од Деловникот е јасен, освен што го предвидел периодот за одмор, јасно во истиот член, став 1 потенцирал дека Собранието е во постојано заседание“, стои во соопштението од Џафери.

Инаку, според дневниот ред што го одредил Џафери, пред Комисијата треба да бидат претставени неколку платформи или завршни извештаи на македонски амбасадори, а не е предвидено излагање на министерот за надворешни работи Никола Димитров.


Коѕиаѕ: Данска, Франција и Холандија бараат одложување на преговорите со Македонија


Луксембург, 26 јуни, 2018 - 16:58 (META) 

Грчкиот министер за надворешни работи Никос Коѕиас рече дека дискусиите во ЕУ се водат помеѓу земјите кои сакаат старт на преговори со Македонија до летото 2019 година и оние кои сакаат тоа да биде уште подоцна.

– Денеска дискутиравме за проширувањето на Европската Унија, каде постоеја две различни линии. Од една страна мнозинството од 25 земји кои сакаат и прифаќаат да почнат преговорите до летото 2019 за ПЈРМ и Албанија, и од друга страна Данска, Франција и Холандија кои сакаат да го одложат тоа. На многу јасен начин објаснив дека геополитичката и геостратешката политика во регионот, бара помош кон овие земји, а не одложување. Објаснив дека внатрешната ситуација во овие две земји, бара стабилност и безбедност, а не создавање нови проблеми. На крај, се наоѓаме во еден компромис што ќе предвидува дека ќе може да започне отворањето поглавја до летото 2019, односно нешто што е многу важно за нас, со актуелната комисија која многу добро ја знае и ситуацијата и проблемите – рече Коѕиас во Луксембург.

Преговорите за Македонија и Албанија се заглавени, откако земјите членки не успеаја да постигнат компромис утрово, одлучија да преминат на други преговори поврзани за претстојниот Самит, но со можност да се навратат на темата подоцна денеска.


Јанкулоска не дојде во суд поради ризична бременост – „Титаник“ одложен за 3 јули


Скопје, 31 мај, 2018 - 11:31 (META) 

Поради неприсуство на обвинетата Гордана Јанкулоска заради влошена здравствена состојба односно ризичната бременост, рочиштето за предметот на СЈО „Титаник“ денеска се одложи за 3 јули.

Како што информираше адвокатката на Гордана Јанкулоска, Сања Алексиќ, поранешната министерка за внатрешни работи била спречена да дојде на рочиштето поради состојбата во која се наоѓа, при што достави лекарска потврда.

Јавната обвинителка Лиле Стефановска истакна дека во лекарската потврда не е наведена болеста за што е издадено тоа боледување и нагласи дека не е оправдано отсуството.

Судијата Осман Шабани поради неисполнување на условите за одржување на рочиштето ја прекина расправата, што денеска требаше да почне со изнесување на доказите.

Во предметот обвинети се поранешниот премиер Никола Груевски и поранешните функционери Мартин Протуѓер, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ и Едмонд Темелко.


Судењето за „Траекторија“ одложено за 29 мај


Скопје, 23 мај, 2018 - 13:08 (META) 

Адвокатот Димитар Дангов на денешното рочиште за предметот „Траекторија“ побара судењето да се одложи за 29 мај, бидејќи, како што рече, еден од обвинетите, Никола Груевски напладне ќе присуствува на соопштување на пресудата за предметот „Тенк“.

Во случајот „Траекторија“ обвинети се Никола Груевски, Владимир Пешевски, Миле Јанакиески и Љупчо Георгиевски поради тоа што во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатните делници Миладиновци – Штип и Кичево – Охрид ги искористиле и пречекориле своите овластувања.

Тие според СЈО, нанеле штета на државниот буџет од најмалку 155.117.172 евра и за истиот износ на компанијата изведувач и овозможиле да се стекне со имотна корист.


Само што почна, рочиштето за „Монструм“ се одложи за 15 мај


Скопје, 17 април, 2018 - 10:34 (META) 

Рочиштето за случајот „Монструм“ е одложено за 15 мај, поради отсуство на обвинетиот Фејзи Азири кој бил хоспитализиран на пулмологија. Денешното рочиште, кое беше прво откако СЈО го презеде предметот, беше прекинато на самиот почеток, на што реагираше обвинителката Фатиме Фетаи.

Таа истакна дека несериозно е, отсуството на обвинетиот да се правда само со еден документ дека е во болница, на што, судијата Огнен Ставрев одговори дека ќе побара целосна болничка документација за Азири.

На денешното рочиште присуствуваа и родителите на петмината убиени кај Смилковско езеро. Tаткото на едно од убиените момчиња, Горан Наќевски побарал од судијата стражарно да го приведе премиерот Зоран Заев, пишува sdk.mk. Тој рекол дека како политички противник на ДУИ им изнел конкретни докази за вмешаност на функционери од ДУИ во свирепото убиство.

Наќевски, под морална и кривична одговорност, изразил желба, неповикан, на денешното судење за предметот „Монструм“ да даде изјава, и судијата Ставрев му дозволил.

„Кога бевме кај Заев рече дека ќе ни даде шест разговори државна тајна за шест функционери на ДУИ. Но, подоцна тие станаа пет. ДУИ тогаш беше нивни противник. Заев ни ги покажа транскриптите, ни го посочи Невзат Бејта и ни покажа транскрипт од разговор меѓу Невзат Бејта и обвинетиот Фејзи Азири. Не го исполни ветувањето, од политички причини не ни ги даде тие 5 државни тајни“, рече Наќевски.

Тој во името на сите родители побарал да се изврши претрес во седиштето на СДСМ.

„Тврдам дека тие транскрипти се таму. Бараме да не соочите со премиерот Заев, дека не лажеме и не измислуваме. Стражарно приведете го, ќе го почекаме“, додаде Наќевски.

Судот не се изјаснил за барањата на родителите на убиените деца.


Одложена расправата за „Титаник“, адвокатите бараат време за увид во доказите


Скопје, 2 април, 2018 - 12:16 (META) 

По речиси два часа изнесување на приговори од адвокатите на обвинитетите, пред почетокот на главната расправа за случајот „Титаник“, судијата Осман Шабани го одложи рочиштето за 12 април, за да им даде на бранителите дополнтелно време за увид во доказниот материјал од Специјалното јавно обвинителство (СЈО).

Четворица од адвокатите приговорија на листите на доказите доставени со цедињата заедно со обвинителниот акт. Тие приговараа дека во тие цедиња имало нови докази или пак недостасувале докази кои им биле приложени во текот на истражната постапка.

На таквите наводи реагираше обвинителката Лиле Стефанова од СЈО која кажа дека поголем дел од адвокатите веќе ги добиле уредно доказите и дека новите приговори се неосновани.

Дополнително, Боро Тасевски, адвокат на дел од обвинитите, меѓу кои и на градоначалникот на Пустец, Едмонд Темелко, побара јавно објавените прислушувани разговори да бидат изземени од доказите, а во прилог на тоа го наведе решението на Кривичниот совет за оценка на обвинителен акт при Основен суд Скопје 1, од ноември 2015 година.

Тој рече дека неговиот клиент Темелко кој за судењата патува од домашен притвор во Ресен, не може да издржи долго време да седи во судницата, поради неговата здравствена состојба.

Судијата Осман Шабани рече дека Судскиот совет тоа го има предвид, и дека секогаш кога на обвинетиот ќе му биде лошо, соодветно ќе реагира.


Џафери ја одложи расправата за Законот за јазици бидејќи „нема технички услови“


Скопје, 29 јануари, 2018 - 17:39 (META) 

Претседателот на Собранието, Талат Џафери ја одложи расправата за Законот за јазици, кој беше осма точка на дневниот ред на денешната 32. седница, бидејќи како што кажа, „нема технички услови за расправа“.

– Имајќи ја предвид формалната процедура за обработка на сите амандмани кои се 35.569 на број, тие не се довршени. И деловната обврска за превод не е исполнета – рече Џафери.

Тој и наложи на собраниската служба да информира кога ќе има услови да се расправа по ова точка.

На седницата немаше кворум за гласање по 45-те точки на дневниот ред, на кои се и составите на собраниски органи, тела, комисии, делегации, совети и комитети.

Седницата продолжува утре во 12 часот.


Милошоски: Да не дозволиме новиот партиски лидер да биде марионета


Скопје, 20 декември, 2017 - 19:37 (META) 

Да не дозволиме новиот лидер на ВМРО-ДПМНЕ да биде марионета, изјави пратеникот и член на извршниот комитет на ВМРО-ДПМНЕ, Антонио Милошоски пред почетокот на седницата на Извршниот комитет, вечерва во штабот на партијата.

Тој додаде дека, барањата на членовите на партијата се добронамерни, со цел, како што рече, да не се дозволи, „новиот партиски лидер однапред да биде познат и избран во една недемократска и нефер трка за претседател на партијата“.

Коментирајќи ја изјавата на лидерот на ВМРО-ДПМНЕ, во оставка, Никола Груевски дека одлуката за одржување на вонреден конгрес била донесена едногласно, Милошоски рече дека, многупати досега разговарале со Груевски во четири очи, а било разговарано и на состаноци со поширокото партиско раководство, но нивните сугестии биле прифатени само декларативно.

Пратеникот Илија Димовски, рече дека очекува рационална одлука на вечерашната седница на Извршниот комитет, каде најави дека, официјално ќе ги презентира барањата за транспарентен избор на нов претседател и одложување на Конгресот.

– Многупати досега дававме сугестии и забелешки, но во изминативе две недели нашите барања не беа соодветно третирани – рече Димовски.

Прашан дали ќе се кандидира за претседател, тој рече дека нема таква намера, па дури и Конгресот да биде одложен за во февруари.

– Мислам дека не е време за персонални решенија – рече Димовски.

Извршниот комитет на ВМРО-ДПМНЕ вечерва на седница треба да го разгледа писмото потпишано од 30-на членови од партијата, со кое се бара,Kонгресот што треба да се одржи викендов, да се одложи за во февруари.