Министерството за внатрешни работи (МВР) остро ги отфрли неодамнешните тврдења на опозициската партија, ВМРО ДПМНЕ, означувајќи ги како класични дезинформации. Демантот се однесува на објавите дека директорот на Бирото за јавна безбедност (БЈБ) отворил компанија за тргување со компјутерска технологија регистрирана на адресата на неговиот дом. Министерството соопшти дека целта на наводите е дискредитација на поединци и самата институција. Како што додаваат, тие се изнесени без консултација со соодветната институција.
Според портпаролот на ВМРО-ДПМНЕ, Наум Стоилковски, на 12 октомври 2022 година на домашна адреса на Сашо Тасевски е регистрирана компанија за трговија, услуги и производство со ограничена одговорност, а сопственик и управител бил член на семејството на Тасевски.
Стоилковски, на вчерашната прес-конференција обвини дека „Сашо Тасевски е директно одговорен за спречување на криминалот и корупцијата на терен“, но како што вели тој, фактите покажувале дека „веројатно повеќе се посветувал на развојот на приватниот бизнис“.
Од МВР појаснуваат дека минатата година била поднесена Изјава за интереси, официјално евидентирана во документацијата на антикорупционерите, со која се потврдува дека предметната фирма не е на директорот Тасевски. Од Министерството исто така велат дека биле исполнети сите законски обврски и одговорности.
