Потпретседателката на Собранието, Рената Треневска-Десковска од СДСМ, на денешната пленарна седница рече дека типичен производ на режим е вчерашниот закон за забрана на објавување на „бомбите“, кој бил потпишан од еден координатор и од еден заменик-координатор.
Одговарајќи на обвинувањата, пратеникот Крсто Мукоски од ВМРО-ДПМНЕ, кој е еден од подносителите на законот, рече дека тој е задоволен од предлогот и стои зад него.
– Такво решение треба да постои. Исто како и СДСМ, и ние сме во контакт со граѓаните и тие бараат да се донесе ваков закон. Донесовме закон за Специјално јавно обвинителство, избравме специјален јавен обвинител и логично е дека сите материјали требало да му се достават нему. Но, од СДСМ, иако ветија, функционираат како пишман-аџии, ќе дадат збор и потоа го повлекуваат – рече Мукоски.
