Граѓани и активисти вечерва, на вториот ден на жалост, одржаа мирен собир пред Владата, со кој оддадоа почит на загинатите полицајци во вооружениот судир во Куманово.
Тие пред Владата се собраа со цвеќиња и со запалени свеќи. Дел од активистите со креди ги напишаа имињата на загинатите полицајци, а потоа ги оставија цвеќињата и свеќите запалени во нивна чест.
Дел од присутните на облеката имаа залепени налепници со хаштагот „протестирам“.
Граѓаните и активистите донесоа кутија за донации, во која се собираа пари за погодените жители на Диво Насеље.
На собирот, во чест на загинатите, немаше овации, транспаренти и свиркање.
Забележително беше тажното расположение помеѓу присутните и наведнатите глави на полицајците.