Германската канцеларка Ангела Меркел изјави дека во Сирија е неопходна воена акција, иако таа нема да стави крај на војната во земјата.
– Кога станува збор за Сирија, ова го кажувам првпат: ќе биде потребна воена акција, но таа нема да го донесе решението. Потребен ни е политички процес, но тој не се одвива баш најдобро – рече Меркел во интервју за германското радио „Дојчландфунк“.
Според објавените делови од тоа интервју, кое ќе биде целосно објавено во текот на денот, германската канцеларка рекла дека во разговорите ќе мора да биде вклучен и режимот на сирискиот претседател Башар ал-Асад.
– За да се постигне политичко решение, потребно е претставниците на сириската опозиција и оние кои моментално владеат во Дамаск, да имаат успешни преговори – рекла Меркел.
Таа додала дека Русија, САД, Саудиска Арабија и Иран можат да одиграат важна улога во тие разговори, исто како и Германија, Франција и Велика Британија.
