Денеска во Куршумли ан, Министерството за надворешни работи ќе приреди свеченост во соработка со амбасадите на 19 држави со кои пред 20 години се воспоставени дипломатски односи.
Две децении дипломатски односи Република Македонија одбележува со Саудиска Арабија, Романија, Молдавија, Индија, Естонија, Антигва и Барбуда, Иран, Либија, Украина, Сингапур, Казахстан, Монголија, Азребејџан, Литванија, Соединетите Американски Држави, Грција, Австралија, Израел и со Оман.
Настанот ќе го отворат министерот за надворешни работи, Никола Попоски, и амбасадорот на Романија во Македонија, Јустиниан Фошка, кои ќе се обратат во име на државите со кои се одбележува јубилејот.
„Земјите на јубилејот ќе се претстават со комплетно гурманско изненадување и ќе се обидат да ги доловат вкусовите и мирисите карактеристични за нивните земји. Македонската кујна, покрај националните јадења, ќе биде збогатена со учество на македонски компании, чии домашни производи ќе бидат претставени пред гостите, претставници од државниот врв, дипломатскиот кор и од бизнис-заедницата во земјава“, соопштија од МНР.
