На најновата, мартовска ранг-листа што денеска ја објави ФИФА, Македонија бележи нов пад од четири места и сега се наоѓа на 108. позиција.
Македонската фудбалска репрезентација е во групата на 10 најслабо рангирани европски селекции.
Подобро пласирани од македонската се фудбалските селекции на Фарски Острови (105), на Боцвана (106) и на Доминиканската Република (107).
На врвот на ранг-листата има една промена, односно Италија е повторно во најдобрите десет селекции во светот, а првпат по осум години репрезентацијата на Шпанија не е во ова друштво.
Светскиот првак Германија е лидер на ранг-листата, а по неа, во најдобрите пет, се репрезентациите на Аргентина, Колумбија, Белгија и на Холандија.
Од репрезентациите од квалификациската група за Европското првенство во 2016 година, во која настапува Македонија, Шпанија е на 11. место, селекцијата на Словачка е на 22 позиција, Украина бележи пад за четири позиции и сега е 31. место, а репрезентацијата на Белорусија бележи подем за три места и сега се наоѓа на 98. позиција.
Најслабо рангирана е селекцијата на Луксембург, која е на 136. место.
