Локалните и меѓународните медиумски организации ја обвинија косовската влада дека се обидува да ја ограничи слободата на медиумите во Косово откако Министерството за индустрија, претприемништво и трговија го суспендираше деловниот сертификат на приватната телевизија Клан Косова, пишува Приштина Инсајт.
Министерството во средата го суспендираше деловниот сертификат против трговското друштво во чии рамки е телевизијата и поднесе кривична пријава против компанијата, одговорните лица во неа и службениците од Агенцијата за регистрација на бизниси поради сомнение за злоупотреба на службената должност и злоупотреба на економски овластувања.
Според одлуката споделена од Здружението на новинари на Косово, Министерството го суспендирало деловниот сертификат на Клан Косово затоа што адресата на живеење на сопствениците е наводно заведена како „Пеје-Србија и Ѓакове-Србија…, [што е] во спротивност со основните принципи на Уставот на Република Косово“. И двата града се во Косово, а не во Србија.
Телевизискиот канал останува во етер додека Независната комисија за медиуми како институција одговорна за регулирање, управување и надзор на радиодифузерите соопшти дека го анализира случајот.
Клан Косова одлуката ја нарече незаконска и „неправедна, произволна и со автократски премиси“, додавајќи дека претставува обид за нарушување на слободата на медиумите.
Здружението на новинари на Косово ja нарече одлуката „без преседан во поновата историја на Косово“ и директен обид да се диктира и контролира медиумската содржина на телевизијата, пренесува Радио слободна европа на албански јазик.
Загриженост за одлуката на косовската влада изрази и генералниот секретар на Европската федерација на новинари Рикардо Гутиерез.
„Повлекувањето деловен сертификат на медиумска компанија е исклучително сериозен чин. Особено кога зборуваме за водечки приватен радиодифузер во земјата“, напиша Гутиерез на Твитер, додавајќи дека ова е срам за премиерот Албин Курти и неговата влада.