Девет лица денеска исчезнаа, а две се повредени во експлозија во фабрика за експлозиви на истокот на Кина, јавуваат државните медиуми.
Детонацијата се случила во фабрика на хемиската корпорација „Шандонг Тијанбао“ во провинцијата Шандонг, во округот Пинги, наведува агенцијата „Ксинхуа“. Фабриката произведувала експлозивни материјали за цивилна употреба.
Агенцијата наведува дека истрагата за причината за експлозијата е во тек.
Во серија детонации во индустрискиот комплекс Тијанџин во август загинаа повеќе од 160 лица. Тоа покрена дебата за безбедносните стандарди, а властите наредија проверка на индустриските погони, при што некои беа и затворени.