Американскиот државен секретар, Џон Кери, побара од Русија да го прекине бомбардирањето во Сирија и да воспостави прекин на огнот во земјата.
– Русија многу директно ми навести дека е подготвена на прекин на огнот. Иранците пред два дена во Лондон потврдија дека сега ќе поддржат прекин на огнот – истакна Кери. Тој додаде дека набргу ќе биде јасно кој колку е сериозен.
Кери ја обвини руската армија дека користи ненаведувачки бомби кои не се прецизни, поради што има голем број цивилни жртви, меѓу кои жени и деца.
– Руските авиони, исто така, гаѓаат болници и се враќаат да ги бомбардираат луѓето кои ги спасуваат повредените во претходните воздушни напади. Тоа мора да престане – нагласи Кери.
Тој додаде дека Русија имала конструктивни идеи за примена на прекин на огнот во Сирија, но оти тоа би биле само „празни зборови“ ако продолжи воздушната кампања на руската армија.
Вашингтон ја обвинува Москва дека делумно е одговорна за пропаѓањето на мировните договори кои почнаа неделава во Женева.
