Законот за јазиците и Преспанскиот договор ќе бидат ставени на седница во септември, односно најдоцна во октомври, кажа денеска на брифинг со новинарите претседателката на Уставниот суд, Добрила Кацарска. Таа рече дека одложувањето на решавањето по овие предмети е поради недоволниот број на судии во Уставниот суд.
„Пратениците и понатаму не избираат уставни судии. Од 2 јуни е веќе трета година како судот не е комплетиран“, рече таа.
Кацарска информира дека има пет иницијативи за Преспанскиот договор и 13 за Закон за јазици. На есен, кажа, дека ќе биде донесен акт за Уставен суд во кој ќе има измени во поглед на постапката, начинот на работа и финансиската самостојност на Уставниот суд.
Кацарска информираше и дека судот се сомнева во можноста да се внесе националноста во матичните книги на родените, умрените и на венчаните, а тоа, пак, стана возможно откако министерот Кренар Лога донесе посебно Упатство како да се пополнува оваа графа во обрасците.
Уставниот суд се сомнева дека тоа не е во согласност со Уставот и затоа сите седум судии едногласно одлучиле да оформат предмет по сопствена иницијатива.
