Парламентот на Јужна Кореја усвои значајна забрана за производство и продажба на кучешко месо, откако се зголеми јавната загриженост за правата на животните, но и за меѓународниот имиџ на земјата, јавува Асошиејтед Прес.
Одгледувачи на кучиња, револтирани од одлуката, изјавиле дека планираат да ја оспорат уставноста на законот и да одржат протестни собири, што е само уште еден доказ за континуирана жестока дебата за забраната што се води во Јужна Кореја.
Според предлог-законот, колењето, одгледувањето и продажбата на кучешко месо за човечка исхрана ќе биде незаконско од 2027 година и ќе биде казниво со 2-3 години затвор. Не се предвидени никакви казни за јадење кучешко месо.
Консумацијата на кучешко месо, практика стара со векови на Корејскиот полуостров, не е ниту експлицитно забранета ниту легализирана во Јужна Кореја. Неодамнешните истражувања покажуваат дека повеќе од половина од Јужнокорејците сакаат да се забрани кучешкото месо и мнозинството повеќе не го консумираат. Но, според анкетите, секој трет Јужнокорејец сè уште се противи на забраната, иако не јаде кучешко месо.
Националното собрание го усвои предлог-законот со 208:0 гласови.
Тој и формално ќе стапи во сила откако ќе биде одобрен од Кабинетот и потпишан од претседателот Јун Сук Јеол, што се смета за формалност, бидејќи неговата влада ја поддржува забраната.
