Приградската линија 63А која сообраќа на релација Транспортен центар – Ајватовци, во наредниов период ќе сообраќа по изменета траса од вообичаената, поради изградба на надвозник на патот Марино – Бунарџик, информираа денеска од ЈСП Скопје.
Од ЈСП соопштуваат дека трасата на движење од Транспортен центар до Ајватовци е следна:
„Од Транспортен центар до кружен тек во населба Илинден ќе се движи по редовната траса, потоа ќе продолжува по траса на линија 63, по улица „9“, потоа ќе излегува на улица „8“ и ќе врти лево (по траса на линија 66 ), кај складот на „Макпетрол“ (Зегин) ќе врти десно на надвозникот, па ќе продолжува до с.Ајватовци и завршува во с.Бунарџик (сред село), каде ќе биде и последната постојка (свртувалиште)“.
За трасата на движење од Ајватовци до Транспортен центар, пак, од ЈСП информираат:
„Од с.Бунарџик (сред село) ќе се движи до Ајватовци, па ќе продолжува до надвозникот и кај складот на „Макпетрол“ (Зегин) ќе врти лево по улица „8“ (по траса на линија 66), кај раскрсницата Ким ќе врти лево по улица „9“ (по траса на линија 63) и од кружниот тек во населба Илинден ќе продолжува по својата вообичаена траса“.
Изменетиот режим, според ЈСП, се очекува да важи во наредните девет месеци – временски период во кој е предвидено да траат градежните зафати на трасата, односно изградбата на новиот надвозник.
