Ирачката полиција денеска соопшти дека државните сили зазеле повеќе од 90 отсто од градот Рамади, кој од мај годинава е под контрола на Исламска држава.
Коалицијата под водство на САД врши воздушни напади во регионот, а специјално обучени антитерористички единици тргнале од улица во улица да ги потиснуваат џихадистите.
Рамади е главен град на провинцијата Анбар, која се наоѓа на повеќе од 100 километри западно од Багдад.
Напредувањето на ирачките сили и понатаму се одвива бавно, бидејќи милитантите зад себе оставаат експлозивни стапици и поради стравот за безбедноста на цивилите.
Ирачките претставници велат дека ова е најголем успех за државните сили во борбата против исламистите во последните седум месеци.