Педесетгодишен маж од северниот дел на Индија бил убиен од разбеснета толпа луѓе откако се прошириле гласини дека тој и неговото семејство чуваат и консумираат говедско месо, јавува „Би-Би-Си“.
Според информациите, Мухамад Аклак во понеделникот вечерта бил претепан и каменуван од група мажи во градот Дадри, во индиската држава Утар Прадеш.
Во налетот на толпата, тешко повреден бил и неговиот 22-годишен син, кој бил пренесен во болница.
Како што пренесува „Би-Би-Си“, по убиството, локалната полиција уапсила шест лица и во тек е истрага околу тоа кој ја раширил гласината.
Колењето крави е многу сензитивно прашање во Индија бидејќи животното се смета за свето од Индусите, кои сочинуваат 80 отсто од популацијата на земјата, која брои околу 1,2 милијарди луѓе.