Шефот на македонската дипломатија, Никола Попоски, синоќа во Брисел се сретнал со еврокомесарот за преговори за проширување, Јоханес Хан, со кого разговарал за имплементацијата на Договорот од Пржино, приоритетните реформи во Македонија, како и за мигрантската криза.
Попоски и Хан, во однос на спроведувањето на Договорот од Пржино, констатирале дека е најважно што поскоро да се договори составот на Државната изборна комисија (ДИК) и со носење Закон на медиуми да се најде решение за медиумската состојба во Македонија.
Еврокомесарот на средбата изразил задоволство од развојот на настаните во македонската држава и, како што соопштуваат во МНР, рекол дека Европската комисија и ЕУ ќе дадат силна поддршка за почеток на преговорите за членство во Унијата доколку се спроведат приоритетите и изборите минат во најдобар ред.
Попоски и Хан, во однос на бегалската криза, констатирале дека е подобрена комуникацијата со соседните земји на Македонија и оти ова прашање ќе мора да биде затворено на ниво на Европска унија, односно со нивна помош.
