Градежно-трговска фирма од Охрид е осомничена од Финансиската полиција за финансиски криминал од 3.159.000 денари или приближно 50.000 евра.
Управителот на фирмата и сопственикот употребиле фалсификувана фактура со вклучен ДДВ за наводно извршена набавка на опрема. Од извесно физичко лице од Струга, на црно набавиле машина за производство на сокови за која немало соодветна документација.
За да заработат од повратот на ДДВ, употребиле фалсификувана фактура во износ од 20.709.000 денари со искажан ДДВ во износ од 3.159.000 денари од скопска фирма. Оваа фактура никогаш не е платена на наводниот издавач на истата, но затоа, пак, ДДВ во износ од 3.159.000 денари охридската фирма неосновано си го наплатила од државниот буџет.
Финансиската полиција во текот на истрагата утврди дека од 2008 година, па сè до денес, поради отсутност на сопственикот и управител на правниот субјект од Скопје, фирмата не вршела никаква дејност и нема подготвено ниту, пак, доставено никакви фактури кон фирми од Република Македонија.
Поради оштетување на буџетот на Република Македонија за износ од 3.159.000 денари, Финансиската полиција до Основното јавно обвинителство во Охрид поднесе соодветни кривични пријави за сторен финансиски криминал за сопственикот и управителот на охридската фирма.
