Немајќи идеи за подобро Скопје и поради недостиг од програми и проекти за подобрување на животот на граѓаните, на различни начини се обидувате да го минимизирате тоа што е направено во Скопје во изминативе години, реагираат од Градот на обвинувањата на СДСМ за неправилностите што биле најдени во најновиот ревизорски извештај.
„Вашата нервоза е видлива секојдневно, па би сакале да Ве прашаме зошто ви пречат проширените и реконструирани булевари, изградените кружни текови, катни гаражи, новите и уредени паркови, новото зеленило? Во ревизорскиот извештај што го спомнувате тврдите дека се укажува на бројни злоупотреби во работењето на Град Скопје. Во врска со ова, сакаме да Ве повикаме да не го читате овој ревизорски извештај селективно, зашто во истиот извештај не се најдени никакви „криминали“, како што вие тврдите и обвинувате“, пишува во реакцијата.
Од Градот ги повикуваат сите надлежни институции да ја проверат целокупната документација во врска со кој било проект и да се уверат во законитоста на постапките при спроведувањето на капиталните проекти.
