Создавањето паралелни структури во Министерството за внатрешни работи е вовед во граѓанска војна, посакувана од власта во заминување, предупредува движењето ФРОДЕМ.
„Оваа нездрава ситуација е резултат на дејствувањето на партиските послушници и на соизвршители на кривични дела. Министерот Оливер Спасовски, како најодговорно лице во МВР според Уставот и законите, да ги преземе сите неопходни мерки за доведување на ситуацијата во нормала, а сите личности што го нарушиле системот и создале паралелни структури, да бидат процесуирани во согласност со позитивните законски прописи“, соопштија од ФРОДЕМ.
Според движењето, претседателот Иванов со аболицијата, а Специјалното јавно обвинителство со акциите ,,ТНТ” и ,,Траспортер” ја урнале лагата на Никола Груевски дека „пред законот сите се исти“.
Од ФРОДЕМ го повикуваат Иванов да не покажува лицемерност повикувајќи ги политичките партии, потписнички на договорот од Пржино, како и правните експерти да понудат правно решение за излез од ситуацијата и дека треба сам да го најде решението. Според ФРОДЕМ, решението е итно поништување на донесениот незаконски акт и оставка на Иванов.
