Денеска има ново продолжение на конститутивната седница на Собранието, на која пратениците треба да расправаат за изборот на членови и на претседател на Комисијата за избори и за именувања, како и за изборот на претседател на законодавниот дом.
Преку викендот партиите си ги разменија обвинувањата и контраобвинувањата на тема утринските мразовии и штетите по земјоделството, изградбата на новиот клинички центар и околу новата влада.
Во досегашните продолженија, пратениците на ВМРО-ДПМНЕ сами си дискутираат и си реплицираат, СДСМ главно се неактивни, а со секое соопштение или прес-конференција најавуваат „брзо формирање влада“.
Кон повиците на партијата на Груевски за нови вонредни избори, во петокот се приклучи и иницијативата „За заедничка Македонија“.
Од ДУИ директно побараа „партиите на Македонците да се договорат за разврска на кризата“, а сè почести се и непотврдените информациите за наводни директни средби Заев – Груевски.
Нема индикации дека во Собранието ќе се смени вообичаеното сценарио на реплики и на процедурални забелешки.