Фото: Македонско здружение на млади правници

Основниот Кривичен суд, на 30 мај донесе пресуда со која го прогласи обвинетиот Г.П., униформиран полициски службеник вработен во СВР Битола за виновен и го осуди на казна затвор во траење од една година, информираат во Македонското здружение на млади правници (МЗМП) и Хелсиншкиот Комитет за човекови права.

Како што соопштуваат, Основниот кривичен суд, по пресуда на Апелациониот суд со која беше укината првостепена пресуда, во повторно судење донесе идентична пресуда со која полицискиот службеник се прогласува за виновен и истиот се осудува за делото „Малтретирање во вршење на службата“, член 143 од Кривичниот законик.

„Во повторното судење се изведени докази од страна на одбраната кои не биле прифатени во текот на претходното судење. Во врска со настанот, идентично како и во претходната пресуда, судот наведува дека полицискиот службеник го малтретирал оштетениот Н.Ј. и спрема истиот постапил на начин што се понижува човечкото достоинство и човечката личност, со што во целост е исполнето законското битие на кривичното дело кое на обвинетиот му се става на товар со обвинителниот предлог“, информираат оттаму.

Судот утврдил дека на 21 септември пред две години, околу 1 часот, на ул. „Никола Тесла“ во Битола, обвинетиот како службено лице-униформиран полициски службеник во вршење на службата го малтретирал оштетниот Н.Ј. на начин што при обезбедување на лице место по случена сообраќајна незгода, откако кон оштетениот употребил полуга на левата и десната рака, го турнал на земјата и додека оштетениот бил легнат на земјата обвиниетиот го удирал со клоци и тупаници по телото во пределот на главата, по рацете, по нозете, по грбот со што употребил прекумерна сила и спрема оштетениот постапил на начин на кој се понижува човечкото достоинство и човечката личност.

„Одржани се неколку рочишта на кои се сослушани во својство на сведоци оштетениот, доктор по општа медицина како и сведоци на одбраната, а изведени се и повеќе докази помеѓу кои и видео материјалот од кој што судот неспорно утврдил дека веднаш откако бил употребен зафатот од обвинетиот за совладување на оштетениот и тој бил совладан и соборен на земја, обвинетиот продолжил да го удира оштетениот со тупаници и со клоци по телото и главата и тоа додека оштетениот лежел на земја“, информираат од МЗМП.

И покрај тоа што одбраната се повикува на агресивното однесување на оштетениот кон полициските службеници, судот ги отфрлил ваквите наводи со образложение дека “околноста дека оштетениот во критичниот момент бил под дејство на алкохол и агресивно се однесувал, за што се води и кривична постапка против него за кривично дело од член 383 од КЗ, не претставува оправдување за преземените дејствија од страна на обвинетиот и не претставуваат основ за ослободување на обвинетиот од кривична одговорност, кога истиот и покрај тоа што оштетениот бил совладан и соборен на земјата продолжил да го клоца по телото и главата повеќе пати и со тоа применил прекумерна сила”.

Македонското здружение на млади правници и Хелсиншкиот Комитет за човекови права ја поздравуваат ваквата одлуката на судот, особено имајќи ја во предвид неприкосновеноста на индивидуалната слобода, како што и судот истакнува во самата пресуда, односно дека при одмерување на казната особено ги зел во предвид повредата на заштитеното добро на оштетениот, а тоа се слободите и правата на оштетениот, како и зачестеноста на ваквиот вид на кривични дела, како отежнувачки околности.

„Истакнуваме дека ваквиот став на судот и при повторното судење, е од енормно значење поради тоа што е меѓу првите првостепени пресуди каде се изрекува ефективна казна затвор за полициски службеник поради употреба на прекумерна сила кон оштетено лице за кривичното дело Малтретирање во вршење на службата, член 143 од Кривичниот законик. Досегашна судска пракса е изрекување на условна осуда за полициски службеници дури кога е утврдена употреба на прекумерна сила при пречекорувањето на полициските овластувања“, додаваат оттаму.

Оштетениот е застапуван од адвокат Татјана Донеска од Скопје, член на тимот на адвокати на Македонското здружение на млади правници.

Напишете коментар

Внесете го вашиот коментар
Please enter your name here