На кучињата Бен, Рекс, Били кои во Царинската управа се користат при спречувањето на нелегален транспорт на наркотици, оружје и пари ќе им се придружи нивниот нов шепаст колега Бади.
Директорот Стефан Богоев и заменик директорот Муарем Асани присуствуваа на последниот дел од обуката на царинско куче од расата лабрадор кое е донирано и обучувано од страна на Германското друштво за меѓународна соработка (ГИЗ).
Богоев присуствуваше и на практична вежба на Аеродромот Св. Апостол Павле во Охрид, каде беше демонстрирано откривање на недозволена трговија од страна на мобилните тимови со помош на царинските кучиња во реални услови.
Тој изрази благодарност до Германското друштво за меѓународна соработка за досегашната поддршка и истакна дека Царинската управа е подготвена за понатамошно интензивирање на соработката во овој домен бидејќи благодарение на исклучителните способности на кучињата трагачи покрај што им се олеснува работата на цариниците, значително се подобруваат резултатите при спречувањето на шверцот и недозволената трговија.
