Министерот за здравство на Бугарија, Кирил Ананиев ја повлече својата наредба издадена вчера за задолжително носење маски на отворен и затворен јавен простор. Тој ваквото премислување на брифинг во владата го оправда со непостоење општествен консензус за ова прашање.
– Ќе им се обратам на граѓаните со нашата препорака да ги користат маските постојано, кога ќе го напуштат домот и во согласност со законот за здравјето, во кој е кажано конкретно кои места се сметаат јавни. Длабоко сме убедени дека оваа мерка ќе го оддалечи од нас оној момент во којшто би требало да пристапиме кон потешки мерки – рече Ананиев.
Тој исто така посочи дека државата ќе купи еден милион заштитни маски за социјално загрозените граѓани, коишто не можат да си ги дозволат.
– Ќе порачаме маски тип FFP2 или 3 – појасни тој.
Истовремено, бугарскиот премиер Бојко Борисов имал телефонски разговор за купување од Јужна Кореја на по 30.000 PCR тестови за корона вирус месечно, но точната бројка треба да се утврди наскоро.
