Неколку илјади битолчани во моментов се пред вратите на локалната власт на протест против одлуката на претседателот Ѓорге Иванов да го аболира градоначалникот Владимир Талески.
На чело на демонстрантите стои битолската опозиција, која пред кратко време се обиде покрај полициското обезбедување да влезе во општинската зграда.
Благојче Котевски, советник од опозицијата, вели дека се собрале со голем револт против одлуката на Иванов да аболира убијци од редовите на власта, соучесници во убиства, во фалсификување на избори, криминалци.
– Хорхе Први Паљурски нема право да аболира криминалци за украдени пет милијарди евра. Меѓу аболираните е и градоначалникот Талески, кој 12 години ја тероризира Битола. Поради неговите погубни политики, 30.000 млади си заминаа од градот. Тој човек е под истрага на СЈО и никој нема право да му ја подарува слободата. Талески ќе мора да одговара за целиот криминал што го направил – вели Котевски.
Зградата на Општината ја обезбедуваат околу десетина полицајци, а демонстрантите цело време извикуваат „Правда“ и „Доста е“.
