Претседателот на политичката партија Народно движење за Македонија, Јанко Бачев, денеска напладне до Специјалното обвинителство го достави предлогот со кој бара тоа да преземе предмет, по кривична пријава на партијата, за наводно фалсификување на пописот од 2002 година.
– Станува збор за кривична пријава поднесена од Народно движење на Македонија на 24 септември 2009 година за фалсификување на пописот во 2002 година. За жал, оваа кривична пријава до ден денеска остана закочена во фиоките на Јавното обвинителство на Република Македонија. Со новиот Закон за јавно обвинителство за гонење кривични дела поврзани и кои произлегуваат од содржината на незаконското следење на комунакциите, се отвара можност овој предмет да биде преземен од специјалната обвинителка – изјави Бачев.
Тој тврди дека станува збор за кривична пријава со квалитетни докази и со факти од кои „јасно се гледа како е изведена таа фалсификувана статистичка операција во 2002 година и тоа во сите фази на пописот“.
– Со тој спорен попис од 2002 година беше осуетена намерата за европски и граѓански концепт на Македонија, а се воспостави еден систем на колективни права врз основа на процент од кој, верувам дека не се задоволни самите Албанци. Ние сме длабоко убедени дека нашиот предлог за преземање на предметот ќе наиде на разбирање кај специјалната обвинителка бидејќи станува збор за предмет од највисок национален интерес за земјата – рече Бачев, додавајќи дека нивните очекувања за преземање на предметот се дотолку поголеми поради тоа што „деновиве водачите на албанските партии во Македонија агресивно настапуваат со нови барања и се преземаат некои чекори во насока на федерализација на земјата“.
