Башар ал Асад на шега регираше на неодамнешното соопштение на некои од преставниците на Западот, дека сирискиот лидер засега може да остане на власт. Западот претходно инсистираше на заминување на Асад од власта.
– Час ми велат оди, час ми велат остани. Им благодарам што ми дозволија да останам. Јас веќе си ги спакував куферите и сакав да си одам, но сега можам да останам – рече Асад во интервју за холандската телевизија НОС.
Асад во интервјуто вели дека само сирискиот народ може да одлучи за тоа дали тој ќе остане на власт во Сирија.
– Сирија е суверена држава. Дали претседателот е добар или лош одлучуваат Сиријците, а не Европејците. Ако сирискиот народ сака да ја напуштам мојата функција, јас сум подготовен да го сторам тоа – изјави Асад.
Според Асад, Европа, заедно со Турција, Катар и со Саудиска Арабија, ја претворила Сирија во земја која е расадник на тероризам. Тој смета дека Европа има неправилен пристап во борбата против тероризмот.
– Европските влади не успеаја да се изборат со интегранција на мигрантите во еврпското општество. Тие живеат во гета, а кога живееш во гето, стануваш екстремист – наведе сирискиот претседател.
