Тим од експерти за аутизам од САД, минатата недела спроведе обука на македонски доктори. Во тимот има четири доктори и професори од Центарот за истражување и третман на аутизам, во рамки на Универзитетот на Калифорнија – Лос Анџелес (УКЛА), кој претставува еден од најпрестижните едукативни центри во светот. Тимот го предводеше професор доктор Кони Касари.

Во текот на вчерашниот ден, тимот оствари средба со министерот за здравство, Никола Тодоров, на која се разговараше за потребата од воведување програма за рано детектирање и третирање на деца со аутизам, по примерот на американскиот модел на ваква програма. Целта е со имплементирање на програмата, да се обезбеди третман за овие деца од најмалку 20 часа неделно, што ќе претставува голем чекор во насока на унапредување на состојбата од најраната возраст на децата со аутизам, чиј третман моментално се сведува на неколку часа неделно.