Американскиот теоретичар на заговори Алекс Џоунс ќе мора да плати вкупно 49,3 милиони долари за ширењето дезинформации за масакрот „Сенди Хук“, јавува Би-би-си. Покрај веќе пресудената компезациска отштета од над 4,1 милиони долари, судот во Тексас на контроверзниот радио водител му досуди и дополнителни 45,2 милиони долари како казнена отштета.
Компезациската отштета, меѓу другото, треба да ги покрие реалните трошоци за семејството Нил Хеслин и Скарлет Луис, таткото и мајката на Џеси Луис, кој заедно со 19 други ученици и шестмина учители, загинаа во нападот на училиштето во 2012 година. Тие ја покренаа тужбата против Џоунс, но беа приморани да ангажираат и приватното обезбедување што го најмија за време на судењето поради страв од напад од поддржувач на Џоунс.
Судиите досудија над 4,1 милиони долари на семејството на загинатиот ученик поради нарушувањето на угледот и намерното нанесување емоционални повреди со дезинформациите пласирани од Џоунс, кој долго време во своите емисии на „Инфоворс“ (Infowars) и настапи тврдеше дека масакрот во „Сенди Хук“, еден од најсмртоносните училишни инциденти во историјата на САД, е инсцениран за да се воведат построги мерки за поседувањето и носењето оружје. Џоунс вели дека сцените се изрежирани и всушност немало масакр.
Ова е првпат основачот на „Инфоворс“, онлајн медиум познат по ширењето дезинформации и теории на заговор, како и самиот медиум, да добијат парична казна за негирањето на масакрот во „Сенди Хук“.
Поротата во Тексас пресуди дека радио водителот мора да плати 45,2 милиони долари за казнена отштета, која треба да дејствува како пречка што би го спречила Џоунс да го повтори своето дело во иднина.
Адвокатот на семејството кое ја поднесе тужбата против контроверзниот радио водител рече дека треба да се сопре монетизацијата на дезинформациите и лагите што се пласираат во јавниот простор, при што економист најмен од семејството во судскиот процес тврдеше дека медиумскиот бренд „Инфоворс“ и матичната компанија на Алекс Џоунс „Фри Спич Системс“ вредат до 270 милиони долари.
