Фото: Фисник Џелили/Порталб.мк

Наскоро навршува една година од трагедијата со пожарот во модуларната болница во Тетово каде животот го загубија 14 лица, а опожарениот објект сѐ уште не е отстранет. Здравствените власти за Порталб.мк велат дека во тек е постапка за собирање понуди за отстранување на тоа што останало, пишува Портал.мк.

За многу граѓани овој објект се претвори во ноќна мора и буди тажни спомени секогаш кога ќе го видат. Во меѓувреме, деца од околните маала поминуваат и играат во објектот, што не е безбедно. Во близина на опожарената зграда денеска се паркираат и автомобили, а во близина може да се забележи и мини депонија со отпадоци.

Од Министерство за здравство (МЗ) и Тетовската болница велат дека објектот наскоро ќе биде отстранет, но без да наведат конкретен рок.

„Фазата на проценка на вредноста, која беше спроведена минатиот месец, веќе е завршена. Во моментов тече постапка утврдена со закон за прибирање понуди за отстранување на преостанатите делови од објектот“, соопштија од МЗ и Тетовската болница.

Потсетуваме, Обвинителството им даде согласност на институциите за отстранување на остатоците од објектот.

Основното јавно обвинителство поднесе кривична пријава против три физички и едно правно лице за случајот со опожарувањето на болницата.

Се дознава дека станува збор за поранешниот директор на болницата, здравствениот директор, раководителот на КОВИД Центарот и Тетовската болница како правен субјект, но имињата не се потврдуваат официјално.

„Јавното обвинителство и во овој, како и во секој друг предмет во кој постапува, ја штити пресумпцијата на невиност и не го објавува идентитетот на осомничените или обвинетите. По поднесувањето на обвинителниот акт, предметот продолжува со судска постапка во Основниот суд Тетово“, соопштија од Обвинителството.

Првите двајца се товарат по член 292, а во врска со член 288 од Кривичниот законик за – Тешки кривични дела против општата сигурност.

Трето – обвинетиот за кривично дело Непочитување на здравствените прописи за време на епидемија по член 206 став 1 од Кривичниот законик.

Правното лице се товари за кривичното дело – Предизвикување општа опасност по член 288 и Непостапување согласно здравствени прописи за време на епидемија според член 206.

Обвинителството на Тетово поднесе пријава до Судот во Тетово, но истото се очекува да биде процесуирано после 15 август, кога судиите ќе се вратат од годишен одмор, и  потоа ќе продолжат и другите постапки.

„Начинот на кој избувнал пожарот е утврден со вештачење на локални и германски експерти, чии наоди обвинителството ги објави во текот на постапката“, заклучија од Обвинителството.

Во извештајот на крим-техниката било проценето дека пожарот настанал од краток спој во приклучниот кабел на дефибрилаторот.

Страшниот пожар што ја претвори во пепел модуларната болница во Тетово, со себе однесе 14 животи на пациенти кои се лекувале од ковид-19, но и членови на семејствата кои биле внатре. 14 лица беа спасени пред објектот целосно да изгори.

Напишете коментар

Внесете го вашиот коментар
Please enter your name here