Иранскиот врховен лидер, ајатолахот Хаменеи, забрани какви било понатамошни преговори меѓу Иран и САД, речиси три месеци откако Техеран го потпиша договорот за нуклеарната програма со Западот.
Ајатолахот истакнал дека низ преговорите, Американците настојувале да влијаат врз Иран и оти има наивни луѓе во Иран кои не го разбираат тоа.
Политичкиот договор со светските сили, кој е постигнат во јули, се смета за политичка победа на умерените сили во Иран, на чело со претседателот Хасан Рохани. Сепак, ајатолахот никогаш јавно не го одобрил договорот.
– Преговорите со САД отвораат врата за нивно економско, културно, политичко и безбедносно влијание. Дури и во текот на преговорите, тие се обидувале да им наштетат на националните интереси, кога имале шанса за тоа – наведе Хаменеи на својата официјална веб-страница.
Коментарите на ајатолахот се директно спротивни со политиката на иранскиот претседател, кој тежнее кон нормализација на односите на Техеран со Западот.